BDU-da Ustad Dərsi: Kibertəhlükəsizlikdə Data Analitika və Gələcəyin Karyera İmkanları

7 may 2026-cı il tarixində Bakı Dövlət Universitetinin Tətbiqi riyaziyyat və kibernetika fakültəsində tələbələr üçün növbəti maarifləndirici ustad dərsi baş tutub. Azərbaycan İnformasiya və Kommunikasiya Texnologiyaları Sənayəsi Assosiasiyası nəzdində fəaliyyət göstərən CyberBridge Texnologiya və İnnovasiya Təşəbbüsünün təşkilatçılığı ilə keçirilən görüş böyük maraqla qarşılanıb.
Tədbirdə CyberBridge-in icraçı direktor müavini Arzu Əhmədova və peşəkar təlimçilər — Mədinə Dəmirova, Aysu Zülfiqarlı və Fidan Məlikməmmədova iştirak ediblər.
"Kibertəhlükəsizlikdə Data Analitikanın rolu: Təhlükələrin aşkarlanması" mövzusunda çıxış edən məruzəçilər aşağıdakı vacib istiqamətlərə toxunublar:
Data Analitika və İnnovasiya: Sahənin bu günü, gələcək trendləri və qlobal texnologiya bazarındakı yeri;
Karyera və İş İmkanları: Həm ölkə daxilində, həm də beynəlxalq səviyyədə mövcud olan vakansiyalar və inkişaf yolları;
Təhlükəsizlik Strategiyaları: "Red Team" əməliyyatları, real hücum ssenariləri və bu təhdidlərdən effektiv qorunma metodları.
Seminarın əsas məqsədi tələbələrin kibertəhlükəsizlik ekosisteminə inteqrasiyasını sürətləndirmək və onlara praktiki biliklər aşılamaqdır. İnteraktiv formatda keçən görüşün sonunda təlimçilər tələbələrin çoxsaylı suallarını cavablandıraraq, onlara gələcək peşə fəaliyyətlərində uğurlar arzulayıblar.